കണ്ണീരിന്റെ രുചിയെന്താണ്....?
ഹൃദയം കണ്ണുകളോട് ചോദിച്ചു...
കണ്ണുകളിപ്പോള്‍ കരയാറില്ലത്രേ....
പകരം.... ചുണ്ടുകള്‍ വിളറിയ
ഒരു ചിരി ചിരിക്കും...
ആ ചിരിയില്‍....
ഇമകള്‍ക്കിടയില്‍ നിന്നും
സ്വതന്ത്രരാവാന്‍ പിടക്കുന്ന
കണ്ണീര്‍ തുള്ളികളെ
കണ്ണുകള്‍ ഇറുകെ പൂട്ടിയുറക്കും.....
സ്ഫടിക ഗോളം പോലെ
ഹൃദയം നുറുങ്ങുമ്പോഴും
കണ്ണുകള്‍ കരയാത്തത്
എന്തു കൊണ്ടാവും... ?
ജീവിത യാത്രയിലെ
ഹ്രസ്വ സഹ സഞ്ചാരിണികളുടെ
നഷ്ട സ്വപ്‌നങ്ങള്‍ക്കു വേണ്ടി
പൊഴിക്കാനുള്ളതല്ല
കണ്ണു നീരുകളെന്ന്
ഹൃദയത്തിനറിയും മുമ്പേ
കണ്ണുകള്‍ക്കറിയാമായിരിക്കാം...
എങ്കിലും ഹൃദയമിപ്പോഴും
സ്വപ്‌നങ്ങള്‍ ചിതറിയ
മേച്ചില്‍്പ്പുറങ്ങളിലാണ്....
കണ്ണുകളും കാതുകളും
കയ്‌പേറിയ യാഥാര്‍ത്ഥ്യങ്ങളുടെ
നേര്‍ക്കാഴ്ചകള്‍ക്കു മുന്നിലും....
എന്റെ കണ്ണുകളില്‍
ഇനിയും പൊഴിയാതെയിരിക്കുന്ന
കണ്ണു നീര്‍ത്തുള്ളികള്‍
ആരെയായിരിക്കും കാത്തിരിക്കുന്നത്....?
